منقبت : درشان ِ سیدنا امام جعفر بن محمد الصادق(رضی اللہ عنہ)

کیسے دیکھے کوئی رفتارِ امامِ صادق
کاش بن جاؤں میں دلدارِ امامِ صادق

کتنے اذہان پہ انوارِ حقیقت کھولے
منبعِ فیض تھا دربارِ امامِ صادق

مجھ پہ بھی علم کی اور فقر کی میراث کھلے
میرے سینے میں ہو مہکارِ امامِ صادق

بن کے نکلے وہ فقیہہ اور امامِ عالَم
پڑ گئے جن پہ بھی انوارِ امامِ صادق

علم کا جیسے سمندر ہو رواں سینے میں
منکشف جب بھی ہو گفتارِ امامِ صادق

وہ سیاست ہو یا پھر فہم و فراستِ علمی
سارے عالم پہ ہے للکارِ امامِ صادق

کس میں جرأت کہ کرے ظلم کسی مفلس پر
ہر گھڑی موج میں تلوارِ امامِ صادق

کتنی صدیوں کی مسافت کا سفر بِیت چکا
اب تلک ثبت ہے کردار امامِ صادق

علم و عرفان کی صورت میں جو تقسیم ہوا
کیسا بے مثل ہے ایثارِ امامِ صادق

زہر دینے کو بلایا جو شہہِ دوراں نے
جُھک گئے قدموں پہ اغیارِ امامِ صادق

میری بخشش کا یہی کاش وسیلہ بن جائے
اک گنہگار ہے حبدارِ امام صادق

معرفت، حلم، سخا، فقر و ہنر کا جامیؔ
کس سے اٹھ پائے بھلا بارِ امامِ صادق

٭٭٭