نذرانہ عقیدت دربار گاہ ِ سیدالانبیاءﷺ

میں مانگتا پھرتا ہوں دعا شاہِ مدینہ
مسکن ہو مدینے کی فضا شاہِ مدینہ

یہ آپ (ﷺ) کی رحمت ہے کہ خالی نہیں موڑا
کاسہ مرا فی الفور بھرا شاہِ مدینہ

دنیا میں نہ عقبٰی میں کوئی آپ (ﷺ) سا ہوگا
رُتبہ کہ ہے عالم سے جُدا شاہِ مدینہ

رب اپنا کرم خاص عطا کرتا ہے اُن کو
کرتے ہیں زمانے کو عطا شاہِ مدینہ

محبوبِ خدا آپ کی حد ہو نہیں سکتی
خود رُتبہ بیاں رب نے کیا شاہِ مدینہ

مجھ بے کس و نادار پہ رحمت کی نظر ہو
اک عاصی پریشان ہُوا شاہِ مدینہ

ہے اس کے نصیبوں پہ مجھے رشک ہمیشہ
جو آپ (ﷺ) پہ قربان ہوا شاہ مدینہ

جو آپ کی عظمت کو نہیں مانتے آقا (ﷺ)
اُن لوگوں سے خود رب ہے خفا شاہِ مدینہ

عزت ہے نہ شہرت نہ کوئی نام ہے میرا
سب آپ (ﷺ) کے در سے ہے مِلا شاہِ مدینہ

مالائیں میرے لب پہ درودوں کی ہیں جامیؔ
کرتے ہیں فقیروں کا بھلا شاہ مدینہ

٭٭٭