"اِنحطاط کے دور میں اجتہاد سے تقلید بہتر ہے"(فارسی نظم)

موجودہ دور اپنے اندر بہت سے فتنے رکھتا ہے اس کی بے باک طبیعت سراپا آفت ہے-

عہد حاضرنے گذشتہ اقوام کی بزم کو برہم کر دیا اور زندگی کی شاخوں کونمی سے محروم کر دیا-

دور جدید کے جلوؤں نے ہمیں اپنا آپ بھلا دیا ہے اور ہمارے سازِ زندگی کو نغمہ سے محروم کردیاہے-

 اس نے ہمارے دل سے عشق کی قدیم آگ چھین لی ہے اور ہمارے سینوں سے لاالٰہ کے نُور اور گرمی کو نکال دیا ہے(ان دو اشعار کی مناسبت آگے چل کر "عقلِ آبایت" والے شعر سے قائم ہوتی ہے ) -

 جب زندگی کی ساخت کمزور پڑ جاتی ہے تو اس وقت قوم تقلید ہی سے استحکام پاتی ہے-

 اپنے آباء کے راستے پر چل کہ اسی میں جمعیت ہے، تقلید کا مطلب ملت کو ایک ضبط کے تحت لانا ہے-

 اگر خزاں کے دوران درخت پھل پھول سے محروم ہو تو بہار کی امید میں اسے اپنا تعلق منقطع نہ کرلے-

ا گرتو  بحر گم کر چکاہے تواپنے نقصان کا احساس کر کم از کم اپنی کم آب ندی کا تو تحفظ کرلے-

ہوسکتاہے کہ اس ندی کے اندر دوبارہ کوہسار کا سیل آجائے اور وہ اپنی آغوش میں نئے طوفان کی پرورش کرلے-

 اگر تیرے بدن میں بصیرت کی حامل روح موجود ہے تو بنی اسرائیل کے احوال سے عبرت حاصل کر -

 اس کے حالات کی سختی ونرمی پر غورکر اور پھر دیکھ اس کی کمزور جان نے اسے کس ہمت سے برداشت کیا ہے-

 اس کی رگوں میں خون کی گردش سست پڑ چکی ہے اس کی پیشانی سینکڑوں دہلیزوں پر سجدہ ریز ہے –

 آسمان کے پنجے نے اسے انگور کی طر ح نچوڑ ڈالا مگر یہ قوم  جو موسیٰ اور ہارون (علیہ السلام) کی یادگار ہے، مٹ نہ سکی-

 اس کی نوائے آتشیں سے سوز جاتا رہا لیکن اس کے سینے میں ابھی تک دم موجود ہے-

 اس کی وجہ یہ ہے کہ جب اس کی جمعیت ختم ہوگئی تو اس نے بزرگوں کی راہ نہ چھوڑی-

اے مسلمان تیری قدیم محفل پریشان ہو چکی ہے، تیرے سینے کے اندر زندگی کی شمع بجھ چکی ہے-

تو اپنے دل پر دوبارہ توحید کا نقش کندہ کر اور اپنے اَسلاف کی تقلید سے اپنی مشکلات کی چاره سازی کر-

زوال و انحطاط کے زمانے میں اجتہاد قوم کا شیرازہ بکھیر دیتا ہے اور اس کی بساط لپیٹ دیتا ہے-

کوتاہ نظر (بے بصیرت) عالموں کے اجتہاد کی بجائے اسلاف کی پیروی (تقلید) خطرات سے زیادہ محفوظ ہے-

 تیرے آباء و اجداد کی عقل ہوس کا شکار نہیں تھی (یعنی کسی دوسری تہذیب کی نفسیاتی غلام نہیں تھی)-پاک بازوں کے کام خود غرضی سے آلودہ نہیں ہوتے –

ان کی فکر نے بڑی باریکیاں پیدا کیں-ان کا تقوٰی حضور نبی کریم (ﷺ) کے قریب تر تھا-

 اب امام جعفرؒ کا ذوق و شوق اور امام رازیؒ کی کاوش باقی نہیں رہی- نہ ملتِ حجازی کی وہ شان و شوکت ہے -

ہم پر دین کا راستہ تنگ ہو چکا ہے ہر بیوقوف (فرد)  مایۂ دین کے راز جاننے کا دعویدار (بنا بیٹھا) ہے-

تو جواسرارِ دین سے نا آشنا ہے، اگر تو سمجھ رکھتا ہے تو ایک آئین کی پابندی (یعنی تقلید) اختیار کر-

میں نے نباضِ حیات سے سُنا ہے کہ اختلافات زندگی کے لیے قینچی کی طرح ہیں-

مسلمان وحدتِ آئین ہی سے زندہ ہے ، مِلت کا وجود قرآن پاک سے زندہ ہے -

ہم سب خاک ہیں اور ہمارے دلوں کو بصیرت دینے والا قرآن پاک ہے اسے مضبوطی سے پکڑ لے کہ یہی حبل اللہ  (اللہ کی رسی ) ہے-

اپنے آپ کو موتیوں کی مانند قرآن پاک کے رشتہ میں پرو لے اگر تو نے ایسا نہ کیا تو غبارِ راہ کی طرح بکھر جائے گا-

٭٭٭

سوشل میڈیا پر شِیئر کریں