کلامِ اقبال : پندِ بازبابچہ ءِخویش(فارسی نظم)

تو جانتا ہے کہ سارے باز ایک ہی جوہر سے ہیں، ایک ہی جوہر ذاتی رکھتے ہیں-مشت پر ہیں مگر شیر کا دل رکھتے ہیں-

نیک اطوار اور پختہ تدبیر کرنے والا بن-دلاور اور غیرت دار اور بڑے شکار پر جھپٹنے والا بن-

تیتر ، چکور اور مینا کے ساتھ میل جول نہ رکھ-سوائے اس کے کہ تو ان کے شکار کی خواہش رکھتا ہو –

  کیا تھڑ دلی فقٹی قوم ہے (پرندوں سی) یہ کیسی کم مایہ اور کمینہ قوم ہے جو اپنی منقار (چونچوں) کو مٹی سے پاک کرتی ہے-

وہ باشہ آپ اپنے شکار کا شکار ہو گیا جو اپنے صید کے رنگ ڈھنگ اپنا لیتا ہے –

  کتنے ہی شکرے زمین پر گر گئے دانہ چگنے والوں (چڑیوں) کی صحبت سے ہلاک ہو گئے-

خود پر نگاہ رکھ اور خوش خوش زندہ رہ-دلیری اور درشتی اور شہزوری سے زندگی بسر کر-

نرم و نازک بدن ممولے (بیڑ) کے لئے چھوڑ دے-ہرن کے سینگ کی طرح مضبوط اعصاب پیدا کر-

شادمانی کی قبیل سے جو کچھ دنیا کا مقدر ہے محکمی اور محنت اور پُردمی (یعنی ہمت و طاقت) کی وجہ سے ہے-

عقاب نے اپنے بیٹے سے کیاخوب کہا کہ لہو کی ایک بوند اچھوتے خالص یاقوت (لعل) سے بہتر ہے-

ہرن اور بھیڑ کی طرح بزم (آرام کی زندگی) تلاش نہ کر-اپنے بزرگوں (اسلاف) کی مانند تنہائی کی طرف میلان رکھ-

اسی لئے میں اپنے بزرگوں کی یہ نصیحت یاد رکھتا ہوں کہ کسی درخت کی شاخ پر بسیرا نہ کر-

ہم باغوں اور کھیتوں میں آشیانہ نہیں بناتے کیونکہ ہماری جنت پہاڑوں اور بیابانوں میں  ہے-

زمین پر سے دانہ چگنا غلط ہے کیونکہ خدا نے ہمیں آسمان کی وسعت عطا کر رکھی ہے-(ہم اپنا رزق فضا کی بلندیوں میں تلاش کرتے ہیں-)

وہ اصیل عقاب جو (رزق چننے کیلئے) مٹی پر پاؤں رکھتا ہے وہ پالتو مرغ سے بھی زیادہ نیچ (کمینہ) ہوگیا ہے-

پتھر شہبازوں کے لئے قیمتی غالیچہ ہے کہ پتھر پر چلنا پنجوں کو تیز کرتا ہے-

تو صحراکے زرد چشموں (صحرا کے شکاری پرندوں) میں سے ہے تو سیمرغ کی طرح عالی نسب ہے -

  ایسا اصیل جوان جو جنگ کے دن چیتے کی آنکھ سے پتلی نکال لیتا ہے-

تیری اڑان میں فرشتوں کی سی شان و شوکت ہے-تیری رگوں  میں کافوریوں کا لہو ہے-

اس گھومتے ہوئے کبڑے آسمان کے تلے (نیچے) نرم ہو یا درشت اپنا ہی شکار کیا ہوا کھا-

اپنا نوالہ کسی کے ہاتھ سے نہ لے نیک بن اور اچھوں کی نصیحت سن (قبول کر)-

نوٹ: باز اور شاہین یہ دونوں اقبال کے محبوب پرندے ہیں ان پرندوں میں اقبال کے مرد مومن کی بعض صفات پائی جاتی ہیں-چنانچہ اپنے ایک خط میں جو انہوں نے پروفسیر ظفر احمد صدیقی کو لکھا تھا-بایں الفاظ اس بات کی وضاحت فرمائی تھی کہ ’’شاہین کی تشبیہ‘‘ محض شاعرانہ تشبیہ نہیں ہے-اس جانور میں اسلامی فقر کی تمام خصوصیات پائی جاتی ہیں:

• خود دار اور غیرت مند ہے کہ اور کے ہاتھ کا مارا ہوا شکار نہیں کھاتا
• بے تعلق ہے کہ آشیانہ نہیں بناتا
• بلند پرواز ہے
• خلوت پسند ہے
•  تیز نگاہ ہے

٭٭٭ 

سوشل میڈیا پر شِیئر کریں